MƏZUN OLAN ŞƏHİD ÖVLADLARI DEYİRLƏR:

Pərizad Məmmədova– Qazyan kənd tam orta məktəbinin məzunu:
–44 günlük Vətən müharibəsində erməni cəlladları atamı vəhşicəsinə qətlə yetirdilər. Onun ən böyük arzusu öz övladlarını tərbiyəli və təhsilli görmək idi. Biz – onun hər üç övladı qoymarıq ki, atamızın arzuları yarımçıq qalsın. O zaman körpə olsaq da, bizə necə qayğı ilə yanaşdığı, dərslərimizə necə diqqət göstərdiyi hər birimizin yadındadır. Atam özü təhsil ala bilməmişdi. Işi həmişə ağır idi. Buna baxma-yaraq, evə nə qədər yorğun gəlsə də, dərslərimizi soruşur, hətta ingilis dilini necə öyrənməyimizlə maraqlanır, kiçik qardaşımıza kömək etməyi bacıma və mənə tapşırırdı.
Bəlkə də onun bu tövsiyələri, tapşırıqları olmasaydı, başımıza gələn faciədən sonra biz çətinlik çəkərdik. Ancaq, şükür Allahın böyüklüyünə, özümüzdə güc tapdıq. Atamızın arzularına doğru addım-addım irəlilədik. Hal-hazırda böyük bacım Arzu “Xəzər” Universitetinin tələbəsidir. I kursu bitirib. Mən isə buraxılış imtahanlarından 256 bal, ümumilikdə isə 473 bal toplamışam. IV ixtisas qrupunu seçmişəm. Arzum həkim olmaqdır. Yenə də imtahan verəcəyəm. Əgər bu il Tibb Universitetinə daxil ola bilməsəm, gələcəkdə ikinci təhsil almaq fikrindəyəm. Çünki atam məni məhz həkim kimi görmək istəyirdi.
Qardaşım Zamiq isə doqquzuncu sinfə keçib. O, gələcəkdə kənd təsərrüfatı üzrə ixtisas seçmək istəyir ki, kənddə yaşasın. O, indinin özündə də məktəbli olsa da, anamızın ən yaxın köməkçisidir.
Şəhidlik uca zirvədir. Şəhidlər unudulmur. Biz də atamızı daim yanımızda hiss edir, hər addımımızda ona layiq olmağa çalışırıq. Daha ətraflı »

Nilufəri uşaq vaxtından tanıyıram. Hələ 5-ci sinifdə oxuyarkən məktəblərində keçirilən tədbirlərdən birində doğma Umudlu kəndindən necə həyəcanla danışdığının və kövrəldiyinin şahidi olmuşam. O zaman Nilufər göz yaşları içində: “Mən valideynlərimin doğulduğu o torpağa mütləq ayaq basacağam,” – demişdir. Müzəffər Ali Baş Komandan, Azərbaycan Respublikasının Prezidenti İlham Əliyevin rəhbərliyi ilə Şanlı Azərbaycan Ordusu Nilufər kimi didərginlik həyatı yaşayan minlərlə uşağın, böyüyün arzularını gerçəkləşdirdi. 11-ci sinifdə oxuyarkən Nilufərə valideynlərilə birlikdə heç zaman görmədiyi, ancaq böyüklərin söhbətlərindən çox yaxşı tanıdığı Umudluya səfər etmək nəsib oldu. O, bir zamanlar haqqında ağlaya-ağlaya danışdığı Umudlunu indi sevinc göz yaşları, qürur və iftixar hissi ilə seyr edirdi. Bu barədə özü belə deyir:
– Dünyanı dərk etməyə başlayandan ilk eşitdiyim və hafizəmə əbədi yazılan sözlərdən biri doğma kəndimizin adı olub. Onun tarixini, kənddəki adət-ənənələri öyrənmişdim. Böyüklərin necə həsrət çəkdiyini gördükcə, mən də onlarla bərabər bu hissləri yaşayırdım. Həyatımın ən böyük xoşbəxtliyi Umudluya ayaq basdığımız gündür. İşğal altında olan torpaqlarımızı bizə qaytaran Prezidentimizə həmyaşıdlarım adından ürəkdən təşəkkür edirəm. Bu yolda həlak olan qəhrəmanlarımızın əziz xatirəsini daim yaşadacaq, onların yarımçıq qalmış arzularını həyata keçirəcəyik. Bu yolda sağlamlıqlarını itirən qazilərimizə şəfa diləyirik. Daha ətraflı »

-İyunun 14-də Tərtər rayonunun 34 tam, 10 ümumtəhsil məktəbində “Son zəng” tədbirləri təşkil olunub.
Keçirilən “son zəng” tədbirlərində məktəblərin pedaqoji kollektivləri və məzunlarla birlikdə Tərtər Rayon İcra Hakimiyyəti başçısının birinci müavini Elvin Umudov, hüquq-mühafizə orqanlarının rəhbərləri, YAP rayon təşkilatının sədri Eldar Əsədov, rayon Təhsil Sektorunun müdiri Oqtay Sarıkişiyev, idarə, müəssisə, təşkilat rəhbərləri, şəhid ailələri, qazilər, veteranlar, valideynlər və ictimaiyyət nümayəndələri iştirak ediblər.
Tədbirlər Dövlət himninin səsləndirilməsi ilə başlayıb.
Tədbir iştirakçıları əvvəlcə Ümummilli Lider Heydər Əliyevin və torpaqlarımızın ərazi bütövlüyü uğrunda canlarından keçən şəhidlərimizin xatirəsini bir dəqiqəlik sükutla yad ediblər.
Bu il rayonun ümumtəhsil məktəblərində 784 nəfər şagird 1-ci sinfi, 975 nəfər şagird 9-cu sinfi, 759 nəfər şagird isə 11-ci sinfi bitirir.
Tərtər şəhər 1, 5, 6 saylı tam orta məktəblərində və 2 saylı məktəb-liseydə keçirilən son zəng tədbirlərində iştirak edən rayon icra hakimiyyəti başçısının birinci müavini Elvin Umudov onbirinciləri məzun adı almaqları münasibəti ilə Tərtər Rayon İcra Hakimiyyətinin başçısı Müstəqim Məmmədovun adından təbrik edərək, onlara qədəm qoyduqları müstəqil həyatda uğurlar diləyib, təhsilə olan dövlət qayğısından danışıb, Ulu Öndərin təhsilin inkişafına, müəllimlərə göstərdiyi diqqət və qayğını dilə gətirib, ”Təhsil millətin gələçəyidir”,-kəlamını yada salıb, Daha ətraflı »

İmtahan nəticələri sevindiricidir

Son illər rayonumuzda tam və orta təhsil səviyyəsi üzrə şagirdlərin imtahan nəticələri sevindiricidir. Ötən sayımızda qəzetimizdə şəhər 6 saylı tam orta məktəbin şagirdi Xumar Həsənlinin uğuru haqqında söhbət açmışdıq.
2023-2024 tədris ilində ümumi orta təhsil səviyyəsi üzrə daha 11 şagirdimiz 250 baldan yuxarı nəticə toplayıb. Onlardan şəhər 2 saylı məktəb-liseyin şagirdi Zümrüd Səfərova 286 bal, Umudlu kənd tam orta məktəbin şagirdi Zəhra Nəsimli 282 bal, 1 nömrəli tam orta məktəbin şagirdi Kəklikxanım İbrahimli 281 bal, 5 nömrəli tam orta məktəbin şagirdi Hüseyn Haqverdiyev 276 bal toplayaraq, valideynlərini, məktəb kollektivlərini, eləcə də savadlı, tərbiyəli gəncliyin yetişməsindən qürur duyan hər kəsi sevindirmişlər.
Onu da qeyd edək ki, bu şagirdlər yaxşı oxumaqla yanaşı, ictimai işlərdə də fəaldırlar. Biz onları məktəb və rayon tədbirlərində görür, çıxışlarını maraqla dinləyirik.
Bu gün qazanılan yüksək nəticələr gələcəyə aparan uğurlu yoldur. Hər bir şagirdə bu yolda inamla addımlamağı arzulayırıq.

“EYNİ TƏRTƏR”

Şəhər 1 saylı tam orta məktəbində cari tədris ilində X “p” sinfin əsasında pilot layihə üzrə peşə təmayüllü sinif yaradılıb. Burada uşaqlara dərzi və kompüter operatoru peşələri öyrədilir.
Sinfin rəhbəri Lalə Abdullayeva bu barədə deyir:
–Müasir dövrümüzdə gənclər ali təhsil almaqla yanaşı, müxtəlif peşələrə, xüsusilə həyatımızda böyük tələbat olan müasir sahələrə maraq göstərirlər. Hazırda sinfimizdə təhsil alan uşaqlar məktəbi bitirdikdə attestatla birlikdə müvafiq peşəyə yiyələndikləri barədə sertifikat alacaqlar.
Şagirdlərdən İsi Rüstəmzadə, Elçin Mürsəlov dərzi, Emil Ocaqlı kompüter operatorluğu üzrə biliklərə həvəslə yiyələnirlər.
Qeyd edək ki, peşə təmayüllü sinfi bitirən uşaqlar gələcəkdə ali məktəblərdə təhsillərini davam etdirə biləcəklər. Onlar həm də istehsalatda seçdikləri sahə üzrə çalışmaq imkanı əldə edəcəklər.
Bu layihə uşaqların peşə yönümünü müəyyənləşdirməkdə valideynlərə dəstəkdir. Həmçinin hal-hazırda işğaldan azad edilmiş ərazilərdə müasir peşələrə yiyələnmiş gənclərə böyük ehtiyac olduğunu nəzərə alaraq, növbəti dərs ilindən məktəbdə peşə təmayüllü siniflərin sayını ikiyə çatdırmaq nəzərdə tutulub.

“YENİ TƏRTƏR”

Xoş ovqatlı qonaqlarımız

Qəzetimizin qonaqları – şəhər 6 saylı tam orta məktəbin direktoru Rüfət İsmayılovun və məktəbin IX “b” sinfinin şagirdi Xumar Həsənlinin gəlişi hamımızı sevindirdi və xoş ovqat yaratdı. Belə ki, bu tərtərli qızı artıq nəinki rayonumuzda, respublikamızda çoxları tanıyır. O, ölkə üzrə IX sinfin buraxılış imtahanlarından maksimum bal toplayan 16 şagirddən biridir.
Biz isə Xumarı qəzetimizin oxucularına daha yaxından tanıtmaq istəyirik. İlk olaraq deyək ki, əlaçı qız I Qarabağ müharibəsi şəhidi Teyyub Həsənovun nəvəsidir. Atası Ceyhun Həsənov rayon mərkəzi xəstəxana-sında mülki müdafiə üzrə qərargah rəisi, anası Lalə xanım tibb bacısıdır. Valideynlərinin işi ilə uşaqlıqdan yaxşı tanış olan və onlardan nümunə götürən Xumar gələcəkdə həkim olmaq istəyir. Fikri qəti olsa da, məktəbdəki bütün fənləri öyrənir. Dərs əlaçısıdır. Riyaziyyat və kimya üzrə isə olimpiadalarda iştirak edib və qaliblər sırasında olub.
O, sinif nümayəndəsidir və yalnız özünün deyil, sinif yoldaşlarının da uğuru Xumarı olduqca sevindirir. Bu barədə fikirləri də maraqlıdır.
– Məktəb illəri insan ömrünün ən məhsuldar dövrüdür. Hal-hazırda yiyələndiyimiz biliklər gələcək ömrümüzə işıq salacaq, bizi irəli aparacaq. Çalışıram ki, sinif yoldaşlarım da bu fikirlə razılaşıb, vaxtlarını boş keçirməsinlər, pis vərdişlərdən uzaq dursunlar. Daha ətraflı »

Toğrul Hüseynli şəhər 1 saylı tam orta məktəbin VI sinif şagirdidir. Dərs əlaçısı olmaqla bərabər, gözəl əl qabiliyyəti var. Çəkdiyi rəsmlər rayon səviyyəsində təşkil olunan sərgilərdə nümayiş etdirilir və bəyənilir.
Ümummilli Lider Heydər Əliyevin anadan olmasının 101-ci ildönümü münasibətilə Mərkəzi Meydanda təşkil edilmiş sərgidə Toğrul da iştirak edib. Burada onun böyük sevgi ilə çəkdiyi rəsmi nümayiş olunurdu.
Toğrul özü bu barədə deyir:
–Ulu Öndərin portretini boya ilə çəkmək böyük məsuliyyətdir. Bu işin öhdəsindən gələndə çox sevindim.
Həmin rəsmə görə Toğrul Tərtər rayon İcra Hakimiyyəti, YAP Tərtər rayon təşkilatı və oxuduğu məktəbin rəhbərliyi tərəfindən Fəxri Fərmanla təltif olunub.

“YENİ TƏRTƏR”

Sağlam nəsil yetişdirmək dövlətimizin qarşısında duran önəmli vəzifələrdəndir

Müstəqillik qazandığımız hazırkı şəraitdə yetişən nəslin fiziki tərbiyəsini günün tələbləri səviyyəsində inkişaf etdirərək formalaşdırılması bu gün mühüm aktuallıq kəsb edir. Əlbəttə ki, bu aktual problemin daha da inkişaf etdirilərək formalaşdırılması və modernləşdirilməsi bu sahədə çalışan mütəxəssislərin qarşısında təxirəsalınmaz vəzifələr qoyur. Bu vəzifələrin məktəblərimizdə də beynəlxalq normalara uyğun olaraq təkmilləşdirilməsi zəruri sayılır. Bu gün bütün təhsil müəssisələrində, məktəbdənkənar təhsil müəssisələrində gələcək nəslin fiziki cəhətdən sağlam olmaları və potensial qabiliyyətlərinin inkişaf etdirilməsi üçün hər cür şərait yaradılmışdır.
Azərbaycan Respublikasının Prezidenti cənab İlham Əliyev uşaq-gənclərin intellektual, fiziki və mənəvi inkişafını, ölkənin sosial-iqtisadi, ictimai-siyası və mədəni həyatında fəal iştirakını təmin etmək məqsədilə “2015-2025-ci illərdə Azərbaycan gənclərinin inkişaf strategiyası”nı təsdiq etmişdir. Strategiyada göstərilir ki, gənclərin sağlamlığı, təhsili, məşğulluğu, sosial müdafiəsi və digər məsələlərlə bağlı dövlət tərəfindən genişmiqyaslı tədbirlər həyata keçirilir. Hətta xüsusi qayğıya ehtiyacı olan gənclərin idmanla məşğul olması üçün güzəştli şərait yaratmaq tələbi inkişaf strategiyasında xüsusi yer tutur. Bu tələblər əsasında yanaşsaq görərik ki, uşaq-gənclərin fiziki tərbiyəsi dövlət üçün önəmli məsələlərdəndir. Məktəb, ailə və ictimaiyyətin də məqsədi sağlam nəsil yetişdirməkdir. Bu sahədə hər kəsin öz funksiyası var. Həmin məqsədin reallaşdırılmasına xidmət göstərən sahələrdən biri də uşaqların psixoloji problemlərinin aradan qaldırılmasında müstəsna rolu olan fiziki tərbiyədir. Daha ətraflı »

“Xoşbəxtəm ki, müəlliməm”

Şad xəbər “quş qanadlı” olar, – deyiblər. Azərbaycan təhsilnin inkişafındakı xidmətlərinə görə şəhər 1 saylı orta məktəbin ədəbiyyat müəllimi Fazilə Kərimovanın Azərbaycan Respublikası Prezidentinin Sərəncamı ilə “Əməkdar müəllim” adına layiq görülməsi xəbəri də çox tez yayılaraq, təhsil işçilərilə yanaşı, rayonumuzun bütün ictimaiyyətini ürəkdən sevindirdi.
Biz də Fazilə müəllimin se-vincinə şərik lduq. Onu redaksiyamıza dəvət edib, ürək sözlərini dinlədik:
– Çox böyük qürur və fərəh hissi keçirirəm. Mükafat alanların arasında möhtərəm Prezidentimizə dərs demiş iki müəllim də vardı. İnanıram ki, mənim şagirdlərim də gələcəkdə həyatda ən yüksək mövqe qazanacaqlar. Bunun üçün əlimdən gələni edəcəyəm.
– Nəyə görə müəllim peşəsini seçmisiniz? – sualına o, belə cavab verdi:
– Mənim anam savadsız idi. Amma sinəsi el deyimləri, bayatılarla doluydu. Hərdən öz-özümə məəttəl qalırdım ki, hardan bilir bunları mənim anam? Atam isə həmişə axşamlar bizə kitab oxutdururdu. Biz növbə ilə xalq dastanlarını oxuyar, bütün ailə üzvləri böyük maraqla dinləyərdilər. Bunları deməkdə məqsədim odur ki, ailəmizdə milli-mənəvi dəyərlərimizə, xalqımızın keçmişinə, adət-ənənələrinə dərin hörmət olub. Məhz bunun nəticəsində böyük bacım Roza, sonra isə mən ədəbiyyat müəllimi ixtisasını seçdik. Daha ətraflı »

“Yetirmələrim həm təhsildə, həm də iş fəaliyyətlərində mənim xəyallarımı gerçəkləşdirirlər”

Şəhər 6 saylı tam orta məktəbin ingilis dili müəllimi Zümrüd Zamanova bu sözləri elə qürurla söylədi ki, elə təkcə bu kəlmələrdən onun necə müəllim olduğunu bilmək mümkündür.
Hər kəsin həyatda məqsədi olur. Müəllimin də məqsədi cəmiyyətimizin gələcəyini qura biləcək vətənpərvər, savadlı, dünyagörüşlü gənclərin yetişdirilməsidir. Bunun arxasında necə böyük zəhmət dayandığını hamımız bilirik. Çünki elə bir ailə yoxdur ki, məktəblə əlaqəsi olmasın.
Müxtəlif illərdə Azərbaycan Respublikası Təhsil Nazirliyinin, Tərtər rayon İcra Hakimiyyətinin, təhsil sektorunun Fəxri Fərmanları və mükafatları ilə təltif olunmuş, 1989-cu ildə “Baş müəllim”, növbəti il isə “Metodist müəllim”, 2004-cü ildə Azərbaycan Respublikası Prezidentinin Sərəncamı ilə “Əməkdar müəllim” fəxri adına layiq görülmüş Zümrüd müəllimi uğurlara çatdıran yol haradan və necə başlayıb? Bu sualla özünə müraciət etdik. O dedi:
– Tərtər şəhər 1 saylı tam orta məktəbin məzunuyam. Həyatda əldə etdiyim nailiyyətlərdə məktəbin, burada vaxtilə çalışan qabaqcıl müəllimlərin xüsusi rolu olub. Məktəb illərində qoyulan bünövrə möhkəmdirsə, insanın gələcəyi də ona uyğun qurulur. Əlbəttə, bura hər kəsin özünün şəxsi bacarıqlarını, zəhmətsevərliyini də əlavə etmək lazımdır.
1982-ci ildə Azərbaycan Pedaqoji Xarici Dillər İnstitutunu İngilis və alman dilləri ixtisası üzrə bitirən Zümrüd Zamanova həmin ildən bugünədək Rafiq Nuriyev adına şəhər 6 saylı tam orta məktəbdə çalışır. İstər təhsil aldığı illərdə, istərsə də iş fəaliyyətində o, həmişə fəal olmağa çalışıb, yeniliklərə can atıb. Məktəbdə linqafon kabineti yaradılanda, ingilis dilində ilk linqafon dərslərini Zümrüd müəllim tədris etməyə başlayıb. Şagirdlərin dil öyrənmək həvəsi artıb və onun iş təcrübəsi rayon səviyyəsində yayılıb. Daha ətraflı »