Tərtər Rayon İcra Hakimiyyətinin başçısı Müstəqim Məmmədov Səfərbərlik və Hərbi Xidmətə Çağırış üzrə Dövlət Xidmətinin Tərtər rayon şöbəsinin rəisi Elşən Abdullayev və YAP rayon Təşkilatının sədri Eldar Əsədovla birlikdə tərtərli Vətən müharibəsi şəhidlərinin şəhadətə qovuşmalarının ikinci ildönümü ilə əlaqədar şəhid ailələrini ziyarət ediblər.
Mehdiyev Yasən Alim oğlunun da ailəsi ziyarət olunub.
Yasən Mehdiyev 19 yaşında şəhidlik zirvəsinə ucalıb. O, 44 günlük Vətən müha-ribəsində oktyabr ayının 23-də Xocavənd uğrunda gedən döyüşlərdə qəhrəmancasına şəhid olub, oktyabrın 24-də rayonun Sarıcalı kəndində dəfn olunub.
Şəhid Mehdiyev Yasən Vətən müharibəsində göstərdiyi igidliyə görə ölümündən sonra Azərbaycan Respublikası Prezidentinin Sərəncamları ilə “Vətən uğrunda”, “Füzulinin azad olunmasına görə” və “Xocavəndin azad olunmasına görə” medalları ilə təltif olunub. Yasənin xatirəsi onu tanıyanların qəlbində həmişə yaşayacaq.