26 iyul 2023-cü il tarixdə Azərbaycan Respublikasının Gənclər və İdman Nazirliyinin yaradılmasının 29 illiyi münasibəti ilə Qarabağ Regional Gənclər və İdman İdarəsinin Tərtər Olimpiya İdman Kompleksi ilə birlikdə təşkilatçılığı əsasında Tərtər OİK-da üzgüçülük idman növü üzrə yeniyetmələr arasında rayon birinciliyi keçirilmişdir. Yarışda ümumilikdə 19 yeniyetmə iştirak etmişdir.
Yarışda iştirak edən Qarabağ Regional Gənclər və İdman İdarəsinin idman sektorunun müdiri Şəhram Quliyev və Tərtər OİK-nın direktoru Emin Dadaşov çıxış edərək bildirmişlər ki, Azərbaycanda əsası ulu öndər Heydər Əliyev tərəfindən qoyulan gənclər və idman siyasətinin inkişafında məhz Gənclər və İdman Nazirliyinin vahid mərkəzi icra hakimiyyəti orqanı kimi müstəsna rolu olmuşdur. Çıxış edənlər bildirmişlər ki, 1997-ci ildən Prezident İlham Əliyevin Milli Olimpiya Komitəsinə prezident seçilməsindən sonra ölkəmizdə idmanın inkişafına böyük təkan verilmişdir. Məhz ölkə başçımızın idman siyasətinə göstərdiyi yüksək diqqət və qayğının nəticəsidir ki, Azərbaycan dünyanın qabaqcıl idman ölkələrindən birinə çevrilib. İdmançılarımızın Olimpiya və dünya çempionatlarında uğurlu çıxışları buna əyani sübutdur.
Çıxışlardan sonra yarışa start verilmişdir.
Yarışın yekununda qaliblər Qarabağ Regional Gənclər və İdman İdarəsinin diplom və fərqləndirici sertifikatları ilə təltif edildilər.