Saytın ümumi statistikası:

Saytda məqalələrin sayı - 5,075
Saytda ismarıcların sayı - 0

Arxiv

Sayğac:

Ziyarətçilərimiz:

Flag Counter

Xeyirli, uğurlu olsun!

Möhtərəm oxucular!

DSC_4410hTərtər Azərbaycanın çox qədim tarixə malik yaşayış məskənlərindən biridir. Bu tarix VII əsrdən də əvvələ gedib çıxır. Tərtər çayının adı da məhz tərtərlər tayfasının bu ərazidə yaşadıqlarını isbatlayan faktordur.

Tərtər rayonu 1930-cu ildə yaradılmış və bundan 4 il sonra–1934-cü ilin

aprel ayında «Kolxozçuların varlanması uğrunda» adlı rayon qəzeti nəşr olunmağa başlamışdır. 1937-ci ildə qəzetin adı dəyişdirilərək «Qızıl bayraq» olmuş, 1991-cı  ilin  yanvar ayından isə «Tərtər» adlandırılmışdır.

Erməni quldurları öz məkrli niyyətlərini yenidən həyata keçirmək xülyası ilə bizimlə müharibə aparanda redaksiyanın binasına da mərmi düşmüş və onu dağıtmışdır. Tərtər cəbhə bölgəsinə yerləşdiyinə görə ərazisində qanlı döyüşlər getmiş və bu vuruşmalarda savaşan oğullarımızla yanaşı qəzetin əməkdaşları da öz doğma yurdlarının müdafiəsinə qalxmışlar. Nəticədə erməni təcavüzkarları Tərtərin nəinki bir qarış torpağını işğal edə bilməmiş, hətta Ağdərə rayonunun ermənilər yaşayan xeyli kəndi onlardan azad edilmişdir.   Ermənilər redaksiyanın binasını mərmi ilə dağıtsalar da, qəzetin fəaliyyətini dayandıra bilmədilər. Lakin 1998-ci ilin oktyabr ayından qəzetimiz öz nəşrini məcburən dayandırdı və bununla da düz 2005-ci ilin avqust ayına qədər işıq üzü görmədi.

2005-ci ildə rayona yeni rəhbər təyin olunandan sonra  o, sabiq jurnalistləri yanına dəvət etdi, vəziyyətlə maraqlandı və qəzetin yenidən çap olunması haqqında təklif irəli sürdü. Bu o zaman idi ki, redaksiya binasının bir tərəfi bərbad vəziyyətə düşmüş, avadanlıqlar köhnələrək sıradan çıxmış, bəzi otaqlar isə müxtəlif təşkilatlar tərəfindən tutulmuşdu.

20 qəpiklik bir qələmi belə olmayan, yazmaq üçün sarı kağız tapmayan biz 4 nəfər jurnalist yurdsuz-yuvasız və çox çətin bir vəziyyətdə işə başladıq. Qolumuzdan rayon rəhbəri ilə yanaşı, Azərbaycan Mətbuat Şurasının sədri Əflatun Amaşov, Beynəlxalq Avrasiya Mətbuat Fondunun sədri, Tərtərin Fəxri Vətəndaşı Umud Mirzəyev, Yevlaxda çıxan «Kür» qəzetinin əməkdaşları, ələlxüsus həmin qəzetin baş redaktoru Əminə Yusifqızı tutdular. İməkləməyə təzə başlayan körpə kimi yavaş-yavaş qədəmlərimiz möhkəmləndi.

Tərtər Bələdiyyəsinin iki nəfər işçisinin əyləşdiyi kiçik bir otaqda dizimizin üstündə hazırladığımız materiallar və səhifələrin maketləri əvvəlcə Mingəçevir şəhərində, sonra isə Gəncədə qəzetə çevrildi və adı da Tərtərdə gedən yenidənqurma işləri ilə bağlı «Yeni Tərtər» oldu.

Bu qəzetin hasilə gəlməsi üçün şəxsən mən 10 ildir ki, canımı, qanımı və gözlərimin işığını vermişəm. Buna görə də bu qəzeti öz balam qədər çox istəyirəm.

Vaxtıilə bir oturacaq stulu tapmayan qəzetin əməkdaşları indi normal iş şəraiti ilə təmin olunmuşlar. Əvvəllər 100-200 nüsxə tirajla çap olunan «Yeni Tərtər» hazırda 2000 nüsxə tirajla çıxır və bölgə qəzetləri içərisində öz dəsti-xəttiylə seçilir. Onun əməkdaşları dəfələrlə müsabiqə qalibi olmuş, diplomlar, fəxri fərmanlar, pul mükafatları və qiymətli hədiyyələr almışlar.

Bir az əvvəl fəaliyyət göstərməyə yeri və imkanı olmayan, hətta bir yazı makinası  almağa belə gücü çatmayan qəzetin indi yeni elektron saytı açılır. Xeyirli və uğurlu olsun!

Region mediasında göstərdiyi qayğı üçün mətbuatın yaxın dostu olan möhtərəm Prezidentimizə sonsuz minnətdarlığımızı bildiririk.

Tərtər Rayon İcra Hakimiyyətinin rəhbərliyi və hörmətli abunəçilərimiz qəzetimizin yaşaması üçün əllərindən gələni əsirgəmirlər. Sağ olsunlar!

Sonda sizi əmin etmək istəyirəm ki, əziz oxucular, var gücümüzlə çalışacağıq ki, qəzetimizin bu elektron variantında axtardığınızı tapasınız.

Allahın amanında olun!

Tofiq Yusif,

Azərbaycan Yazıçılar Birliyinin və Jurnalistlər Birliyinin üzvü, «Qızıl Qələm»və «Məmməd Araz» mükafatları laureatı,

«Yeni Tərtər» qəzetinin baş redaktoru