Müasir həyatımızı internetsiz təsəvvür etmək mümkün deyil. Bu gün hətta məktəbli uşaqlar da dərs hazırlayarkən internetdən istifadə edirlər. Çoxları nəğdsiz alış-verişə keçib.
Bir sözlə, keyfiyyətli müasir texnologiyalara indi hər bir evdə ehtiyac duyulur.
Azəronlayn şirkətinin sifarişi ilə Azrabitə Servis MMC cari ilin may ayından başlayaraq, şəhərimizdə köhnə kabellərin yeni fiber optik kabellərlə əvəzləşdirilməsi işini həyata keçirir. Birinci layihə çərçivəsində bu iş Tərtər şəhərində, növbəti mərhələlərdə isə rayonumuzun kəndlərində aparılacaq. Nəticədə internetin səviyyəsi yüksələcək və ən başlıcası isə, müasir texnologiyalar hər bir ailə üçün əlçatan olacaq.
Hal-hazırda küçələrdə dirəklər basdırılır, fiber optik kabellər çəkilir. Şəhərimizin özündə işlərin 80 faizi başa çatıb.
İş icraçısı İlham Hüseynov redaksiyamızda olarkən bildirdi ki, Tərtər şəhərinin müasir internet kabelləri ilə təmin edilməsi məqsədilə görülən tədbirlərin oktyabr ayında başa çatdırılması nəzərdə tutulub.
Növbəti layihənin icrasına isə ilk olaraq Yuxarı Sarıcalı kəndindən başlayacaqlar.
“Yeni Tərtər”