Çıxışlarının birində Ulu Öndər Heydər Əliyev deyib: “İnsan qurmalıdır, yaratmalıdır… hər bir insan ağac əkməlidir, becərməlidir, böyütməlidir. Əgər kimsə sağlam ağacı kəsirsə, o, nəinki xalqına, millətinə, ölkəsinə xəyanət edir, o, öz ailəsinə, özü-özünə xəyanət edir. Ona görə də siz hər bir ağacı qorumalısınız, hər bir ağacın qorunması uğrunda mübarizə aparmalısınız…”
Ümumiyyətlə, ekoloji siyasət Ümummilli Liderin çoxcəhətli fəaliyyətinin mühüm tərkib hissəsidir. Hazırda bu siyasət möhtərəm Prezident İlham Əliyev tərəfindən uğurla davam etdirilir, ölkəmizdə ətraf mühitin mühafizəsi və ekoloji təhlükəsizliyin təmin edilməsi istiqamətində ardıcıl tədbirlər həyata keçirilir.
Ulu Öndərin tövsiyələrinə və dövlət başçısının tapşırıqlarına həvəslə əməl edən tərtərlilər son illərdə şəhərimizin prospekt və küçələrində, parklarda magistral və kənd yollarında minlərlə yeni ağac əkmiş, Vətən müharibəsində şəhidlik zirvəsinə ucalmış oğullarımızın xatirəsinin əbədiləşdirilməsi məqsədi ilə Şıxarx qəsəbəsində “Vətən bağı” salmışlar.
Bu iş elliklə görülür. Tərtər Rayon İcra Hakimiyyətinin başçısı və aparatın əməkdaşları, YAP rayon təşkilatının könüllüləri, İƏD üzrə nümayəndələr, şəhər sakinləri ağacəkmə işlərində yaxından iştirak edirlər.
“Heydər Əliyev ili” çərçivəsində növbəti ağacəkmə aksiyası zamanı şəhərin Heydər Əliyev prospektində, Mehdi Hüseynzadə, Şıxəli Qurbanov, Mahir Əsədov küçələrində və Sabir parkında 700 ədəd eldar şamı, 1000 ədəd qızılgül və 100 min ədəd həmişəyaşıl təkgöz kolu əkilib.
Rayonun kənd yaşayış məntəqələrində də ağacəkmə aksiyalarına start verilib.
Paralel olaraq mövcud yaşıllıqlara qulluq işləri həyata keçirilir.
“YENİ TƏRTƏR”