Baharı gözləyirəm, səssiz-səmirsiz, quşların nəğməsini eşidim, bənövşənin, nərgizin, süsənin qoxusunu duyum, bağ-bağatın otunun, ağacların çiçəyinin ətrindən ciyərimə doyunca çəkim.
Baharı gözləyirəm, dərd-sərimizi, ağrı-acılarımızı qışın qarına-buzuna qatıb sellər-sularla axıdaraq xoş günlərə, firavanlığa, sağlamlığa çıxaq.
Baharı gözləyirəm, ilk qaranquş dəstəsi düşmən tapdağındakı torpaqlardan, Şuşadan, Laçından, Kəlbəcərdən, Dərələyəzdən, Zəngəzurdan, Göyçədən, daha neçə-neçə həsrət qal-dığımız elatlardan müjdə gətirsin, illərin ayrılığına son qoyulsun.
Baharı gözləyirəm, Xan qızı Natavanın, Dədə Şəmşirin, pələsəng ruhları yollardan yığılsın, dağlarımızın, bulaqlarımızın, kol-kos basmış qəbirlərimizin üstünə ağı deyə-deyə yox, həsrətdən dodağı çatlamış halda özümüzü çatdıraq.
Baharı gözləyirəm, vətənimdə yaşayan soydaşlarımın adının üstündən qaçqın, köçkün ayamaları götürülsün, hər kəs doğulub boya-başa çatdığı obasının, elinin torpağına-daşına qovuşsun, ocağı sönmüş obalarda çağırış tonqalları çatılsın. Ərən oğullarımız köhlənlərin belində çapara dönsünlər, xalqı ağ günlərə, xoşbəxtliyə qovuşdursunlar.
Baharı gözləyirəm, xalqımın ruzi-bərəkəti artsın, bolluq, firavanlıq insanları ehtiyacdan qurtarsın. Bu bahar azadlıq, sülh simvoluna çevrilsin.
Səni gözləyirəm, Bahar, ay Bahar! Gəl ki, arzularımıza qovuşaq, yuxularımız çin olsun. Gəl ki, 60-cı baharımı yaşayım! Sənə şükür edə-edə. Səni gözləyirəm, Bahar!!!
Elfuzə Vəliyeva