Rayon üzrə 2016-cı ilin məhsulu üçün kənd təsərrüfatı bitkilərinin əkin sahəsi 27 min 105,6 hektar olmuşdur. Əkin sahəsinin 12 min 565 hektarını və yaxud 46,3 faizini dənli və dənli paxlalı bitkilər, 3140,1 hektarını və yaxud 11,6 faizini texniki bitkilər, 1457,5 hektarını və yaxud 5,4 faizini kartof, bostan və tərəvəz bitkiləri, 9943 hektarını və yaxud 36,7 faizini yem bitkiləri təşkil etmişdir.
2016-cı ildə dənli və dənli paxlalı bitkilərin əkini əvvəlki ilə nisbətən 1336,3 hektar və yaxud 11,9 faiz, o cümlədən buğda əkini 2322,3 hektar və yaxud 41,4 faiz artmış, qarğıdalı əkini 25 hektar və yaxud 14 faiz, digər dənli və dənli paxlalılar əkini 961 hektar və yaxud 17,7 faiz azalmışdır. Nəticədə 2016-cı ildə qarğıdalı nəzərə alınmaqla ilkin çəkidə 42 min 945,4 ton taxıl məhsulu toplanmışdır. Bu isə əvvəlki ilin müvafiq göstəricisindən 2187 ton və ya 5,4 faiz çoxdur.
Dənli və dənli paxlalıların tərkibində payızlıq buğda əsas yer tutur. Belə ki, istehsal olunmuş taxıl məhsulunun 68,9 faizini və ya 29 min 586 tonunu buğda təşkil etmişdir. Taxılın 27,1 faizi və ya 11 min 647 tonu arpa, 1,7 faizi və ya 742 tonu qarğıdalının, 2,3 faizi və ya 970,4 tonu digər taxıl məhsullarının payına düşür. Taxıl istehsalının artımına əsasən əkin sahələrinin artması və onlara düzgün aqrotexniki qulluğun olunması, məhsuldar toxum sortlarına üstünlük verilməsi olmuşdur. Belə ki, 2016-cı ildə taxıl sahələrinin hər hektarından orta hesabla məhsuldarlığı 34,2 sentner, o cümlədən buğdanın məhsuldarlığı 37,3 sentner, arpanın məhsuldarlığı 27,2 sentner, qarğıdalının məhsuldarlığı 48,5 sentner olmuşdur. 2015-ci ilə nisbətən buğdanın məhsuldarlığı 0,2 sentner, qarğıdalının məhsuldarlığı 0,1 sentner artmışdır. 2016-cı ildə təkrar əkindən 290,8 ton taxıl istehsal olunmuşdur ki, onun 242,5 tonu dən üçün qarğıdalı, 47,9 tonu darı, 0,4 tonu sorqo olmuşdur.
Kartof kənd təsərrüfatı məhsullarının istehsalında mühüm yer tutur. Daha ətraflı »

Tərtər Rayon İcra Hakimiyyətinin dəstəyi ilə rayon təhsil şöbəsi, Gənclər və İdman İdarəsi şəhər 2 saylı məktəb-liseydə rayonun ümumtəhsil məktəblərinin şagirdləri arasında 20 yanvar şəhidlərinin xatirəsinə həsr olunmuş “Tariximizin qara səhifəsi” mövzusunda inşa yazı müsabiqəsi keçirildi.
Tədbirdə Tərtər Rayon İcra Hakimiyyəti Başçısı Aparatının İctimai-Siyasi və Humanitar Məsələlər Şöbəsi müdirinin müavini-dini qurumlarla işin təşkilatçısı Elvin Umudov çıxış edərək 20 Yanvar hadisələrinin xalqımızın qəhrəmanlıq tarixi olduğunu, Azərbaycan xalqının öz ərazi bütövlüyünü qorumaq üçün zaman-zaman mübarizə apardığını bildirdi.
Çıxışlar bitdikdən sonra inşa yazı müsabiqəsi başlanıldı. Müsabiqədə rayonun 42 ümum-təhsil məktəbindən 42 şagird iştirak etdi.
Müsabiqənin nəticələri yazılar komissiya üzvləri tərəfindən yoxlanıldıqdan sonra bəlli olacaq. Qaliblər rayon Gənclər və İdman İdarəsinin diplomları ilə təltif ediləcəkdir.

“Yeni Tərtər”

ÖTƏN İLİN YEKUNLARI MÜZAKİRƏ EDİLDİ

Tərtər rayon İHB-nın Söylən kəndi üzrə nümayəndəliyinin 2016-cı ildə gördüyü işlər barədəki illik hesabat yığıncağında məruzə ilə çıxış edən kənd icra nümayəndəsi Mətləb Əsədov bildirdi ki nümayəndəliyimiz üç kəndi–Söylən, Alışarlı və Hacallı kəndlərini əhatə edir. Ərazi 400 hektardır. Bunun 350 hektarı əkinə yararlı torpaq sahəsi kimi kənd sakinlərinə paylanıb. Bələdiyyənin ehtiyat fondunda 6,5 hektar, inkişaf perspektiv fondunda 2 hektar torpaq sahəsi var.
Ərazidə 47 qaçqın-köçkün ailəsi məskunlaşıb.
Söylən kənd İƏD üzrə nümayəndəliyin Söylən Bələdiyyəsi ilə birlikdə tərtib etdikləri tədbirlər planında əsasən kəndarası yolların, qəbiristanlığa gedən yolun təmiri, kəndə gələn baş və köməkçi arxların təmiri, əhalinin elektrik enerjisinə tələbatının təmin edilməsi, yol kənarlarına ağac əkilməsi, 1 ədəd subartezian quyusunun qazılması və bu kimi tədbirlərin həyata keçirilməsi nəzərdə tutulmuşdu.
Bunların hamısı yerinə yetirilib. Alışarlı kəndində 1500 metr, Hacallı kəndində 1000 metr kəndarası yollara qum, çınqıl döşənmiş, kəndə gələn magistral yolun kənarına 250 ədəd ağac əkilmiş, arxların 3 min metri təmizlənmişdir. Daha ətraflı »

FƏALLIQ TƏMİN OLUNUB

YAP Tərtər Rayon Təşkilatının IX konfransına hazırlıq çərçivəsində Seydimli ərazi ilk partiya təşkilatında hesabat-seçki yığıncağı keçirildi.
İclasın gündəliyinə uyğun olaraq Seydimli ərazi ilk partiya təşkilatının sədr müavini Nəsibə Əliyeva konfranslararası müddətdə görülən işlərə dair hesabat məruzəsi ilə çıxış etdi. Məruzədə qeyd olundu ki, ötən dövr ərzində ərazi ilk partiya təşkilatı iş və tədbirlər planlarına müvafiq olaraq öz işini qurmuş, ərazidə ideyasiyasi tərbiyə, təbliğat və təşviqat işlərinin yüksək səviyyədə həyata keçirilməsinə nail olmaq məqsədi ilə hər bir partiya üzvünün partiya tapşırıqları ilə əhatə olunmalarına diqqəti artırmış, təşkilatda partiyaya gənc, ziyalı, dövlətçiliyə sadiq insanların qəbulunu daim diqqət mərkəzində saxlamışdır. Partiya təşkilatı, bilavasitə cəbhə bölgəsində yerləşən kənddə əhalinin siyasi aktivliyinin artırılmasına önəm verməklə, düşmənlə təmas xəttində yaşamalarına baxmayaraq, təsərrüfat işlərinin vaxtında həyata keçirilməsinə insanların səfərbər olmalarını təmin etməyə çalışmışdır. Daha ətraflı »

2016-cı il artıq tarixə qovuşdu. Ötən il–bütün sahələrdə uğur qazanıldı. Ölkə Prezidentinin qeyri-neft sektorunu inkişaf etdirmək barədə verdiyi sərəncamlar– xüsusən kənd təsərrüfatında pambıqçılığın, baramaçılığın, üzümçülüyün inkişaf etdirilməsi barədəki göstərişləri bütün ölkədə olduğu kimi bizim Tərtər rayonunda da böyük həvəslə yerinə yetirilir.
Ölkə Prezidenti möhtərəm İlham Əliyevin ötən il xanımı Mehriban Əliyeva ilə birlikdə 2 dəfə rayonumuza səfəri, burada görülən tikinti, quruculuq, abadlıq işlərindən razı qalması hər bir Tərtər sakini kimi bizim kollektivin də ürəyincə oldu. Bunlarla yanaşı erməni qəsbkarları tərəfindən Sərsəng Su Dəryaçasından gələn suyun qarşısını kəsmələri biz subartezian quyuları istismarı idarəsinin də işlərini xeyli artırır. Buna görə də daim çalışırıq ki, mövcud subartezian quyularının gücündən səmərəli istifadə edək. Rayonumuzun əhalisi əsasən bitkiçilik və heyvandarlıqla məşğul olur. Ümumiyyətlə, hər hansı sahə olursa olsun, onun inkişaf etdirilməsi üçün su vacib amildir.
Kollektivimiz yola saldığımız 2016-cı ili yaddaqalan göstəricilərlə başa vurdu. İşçilərimiz rayon ərazisində yerləşən və idarənin balansında olan 469 ədəd subartezian quyusunun istismarı ilə məşğul olur. Bunlardan 462 ədədi hazırda saz və işlək vəziyyətdədir. Qalan 6 ədəd quyunun yenidən bərpaya ehtiyacı var. Daha ətraflı »

Saxalindən “Yeni Tərtər” qəzetinin redaksiyasına məktub

VƏTƏNƏ SEVGİMİZİ ƏMƏLLƏRİMİZDƏ AXTARIN

Hərbçi ruhuyla böyümək biz iki qardaşda uşaqlıqdan ən gözəl duyğu və valideynlərimiz tərəfindən verilən tərbiyədir, məncə. Bəli, özüm bu gün erməni separatçıları tərəfindən işğal altında olan Qarabağın Laçın rayonunda anadan olmuşam.
1980 – cı ildə valideynlərim Laçın rayonundan köçərək Tərtər rayonunda məskunlaşmışlar. Tərtərdə yaşayarkən hər il biz ata-baba yurdumuz olan Laçın rayonunu ziyarətə gedərdik. Orta təhsilimi yeddinci sinifə kimi hal-hazırda təmas xəttində yerləşən və düşmən tərəfindən daim atəşə məruz qalan Tərtər rayonunun Qapanlı kənd orta məktəbində almışam. Özümü gələcəyin bir hərbçisi kimi görmək üçün Ulu Öndər Heydər Əliyevin təşəbbüsü ilə təməli qoyulmuş Cəmşid Naxçıvanski adına Hərbi Hazırlıq Məktəbinə qəbul oldum. Orda təhsilimi başa vurduqdan sonra hərbi təhsilimi davam etdirmək, ali hərbi təhsilə yiyələnərək gələcəkdə Vətənə layiqli hərbçi kimi yetişmək üçün Rusiya Federasiya-sına gəldim.
Təhsilimi bitirdikdən sonra 2012-ci ilə qədər Rusiyanın müxtəlif bölgələrində bir zabit kimi hərbi hissələrdə qulluq eləmişəm. Hərbi qulluq etdiyim müddətdə müxtəlif medallarla təltif olunmuşam. Rusiyanın müxtəlif bölgələrində hərbi qulluq keçərək sonda göndərişlə Saxalin vilayəti üzrə Hərbi Komissarlıqda xidmət şöbəsinin rəisi vəzifəsinə təyin olunmuşam.
2012-ci ildə təqaüdə çıxaraq hərbi fəaliyyətimi dayandırmışam. Həmin il Saxalin vilayətində yaşayan azərbaycanlıların istəyi ilə Ulu Öndərimizin qurduğu demokratik, suveren Azərbaycan Respublikasını Saxalin vilayətində təmsil etmək üçün mənim təşəbbüsümlə ”Birlik” cəmiyyətinin yaradılmasına nail olmuşuq. Bu barədə Azərbaycan Respublikasının Diasporla İş üzrə Dövlət Komitəsinə rəsmi məlumat vermişik. Fəaliyətə başladığımız ilk günlərdən milli, mədəni, irsi dəyərlərimizin təbliği üzrə bir çox fəaliyyətlərimiz olmuşdur. Daha ətraflı »

Həbib Hüseynov adına Mamırlı kənd tam orta məktəbində şagirdlər “Həyat bilgisi” dərslərinə xüsusi həvəs göstərirlər. Buna səbəb həmin dərslərin əyani surətdə, çox zaman isə təbiətin qoynunda keçirilməsidir.
Məktəbin müəllimi Səbuhi Kərimov böyüyən nəslə təbiəti sevdirmək üçün müxtəlif vasitələrdən istifadə edir. Belə ki, VII sinifdə “Meşələr planetimizin ağciyəridir” mövzusu məktəbin həyətində keçirilmişdir. Dərs zamanı uşaqlar burada müxtəlif meyvə ağacları əkmiş, ağaclara qulluq işini öyrənmişlər.
Müəllim təbiətə sevgi hissini aşılamaqla, eyni zamanda vətənimizə, torpağımıza sevgi hissləri oyadır. Çünki öz məktəbini, kəndini sevən hər kəs böyük mənada vətənini də sevir.
İllər keçəcək, bu gün əkilən ağaclar bar verəcək. Səbuhi müəllim əmindir ki, onun uşaqların qəlbinə səpdiyi məhəbbət toxumları da cücərəcək, indi parta arxasında əyləşib diqqətlə müəllimi dinləyən uşaqlar ölkəmizin layiqli vətəndaşları olacaqlar. Axı, təbiəti sevən insanlar həmişə xeyirxah və zəhmətkeş olurlar.
Məktəbin müəllim və şagird kollektivi Heydər Əliyev Fondunun vitse prezidenti Leyla Əliyevanın təşəbbüsünə qoşularaq hər mövsümdə ya-şıllaşdırma işlərində fəal iştirak edirlər.
Təkcə məktəbin həyətində deyil, kəndin əra-zisində yaşıllıqlara qulluq edir, yeni ağaclar əkir, səliqə-səhman yaradırlar.

“Yeni Tərtər”

DÖYÜŞ GÜNLƏRİNİN ACILI XATİRƏLƏRİ

Tale onun qismətini çoxdan Tərtərə bağlamışdı. El dilincə desək, telli-toqqalı gənclik illərində tərtərli qızı sevib onunla ailə həyatı qurmuşdu. İşğaldan əvvəl Ağdam şəhərində yaşayırdılar. Xoşbəxt idilər. Bu xoşbəxtliyin qarşılığında Uca Allah ailəyə beş oğul veribdi. Bu bəxtəvərliyə bəlkə həsəd aparanlar da olub. Lakin Tərtərdə yaşamasının başqa səbəbi vardı. Səbəb mənfur ermənilərin onun doğma yurdunu–Ağdamı işğal etməsi idi…
Fərzəliyev Qəzənfər İbiş oğlu Ağdam rayonunun Şotlanlı kəndindəndir. Şuşa şəhərindəki pedaqoji texnikumun bədən tərbiyəsi fakültəsini bitirib. İşğaldan əvvəl Ağdam şəhərindəki 1 saylı tam orta məktəbdə işləyib. Qarabağ savaşı başlayan zaman Qəzənfər müəllim də torpaqlarımızın müdafiəsinə qatılıb. N saylı hərbi hissədə kəşfiyyat komandiri olub. Ağdam, Ağdərə və Xocavənd rayonları ətrafında gedən döyüşlərdə iştirak edib. Döyüş günləri onun xatirəsində silinməz acılarla qalıb. O günləri həyəcansız yada salmaq mümkün deyil.
Ermənilərin camaata vurduğu zərbələr hamı kimi Qəzənfər müəllimin də ürəyini göynədir. Söz düşəndə isə dedi:
–Mən yoldaşlarımdan ayrılıb bir gün də evdə qala bilmirdim. Döyüşçü yoldaşlarımızın hamısı mənim kimi düşünürdü. Bir qarış torpağımızdan keçəsi deyildik. Hər əməliyyata var gücümüzlə qoşulurduq. Ilk dəfə Əsgəran rayonunun müdafiəsində minaya düşdüm. Başımdan, qolumdan ağır yaralanmışdım. Bərdədə qospitalda bir aya qədər müalicə aldım, yaralarım sağalmamış yenidən hərbi hissəyə qayıtdım. Ikinci dəfə isə Mərzili uğrunda gedən döyüşdə qolumdan, qılçımdan güllə yarası aldım. Bir müddət qospitalda müalicə olundum. Oradan çıxan kimi yenə də yoldaşlarımın yanına, hərbi hisssəyə qayıtdım. Daha ətraflı »

1990-cı il yanvarın 19-dan 20-nə keçən gecə, saat 23.30-da Bakı şəhərinə keçmiş Sovet İttifaqının qoşun hissələri fövqəladə vəziyyət elan edilmədən yeridilmiş, dinc əhaliyə divan tutulmuş, yüzlərlə insan qətlə yetirilmiş, yaralanmış, itkin düşmüşdür. Sovet ordusunun, xüsusi təyinatlı dəstələrin və daxili qoşunların iri kontingentinin Bakını zəbt etməsi xüsusi qəddarlıq və misli görünməmiş vəhşiliklərlə müşayiət edilmişdir.
Fövqəladə vəziyyətin tətbiqi əhaliyə elan olunanadək hərbi qulluqçular 82 nəfəri amansızcasına qətlə yetirmiş, 20 nəfəri ölümcül yaralamışlar. Fövqəladə vəziyyət elan edildikdən sonra isə yanvarın 20-də və sonrakı günlərdə Bakı şəhərində 21 nəfər öldürülmüşdür. Fövqəladə vəziyyətin elan olunmadığı rayonlarda—yanvarın 25-də Neftçalada və yanvarın26-da Lənkəranda daha 8 nəfər qətlə yetirilmişdir.
Beləliklə, qoşunların qanunsuz yeridilməsi nəticəsində Bakıda və Azərbaycanın rayonlarında 146 nəfər öldürülmüş, 744 nəfər yaralanmış, 841 nəfər qanunsuz həbs olunmuşdur; hərbi qulluqçular tərəfindən 200 ev və mənzil, 80 avtomaşın, o cümlədən təcili yardım maşınları, yandırıcı güllələrin törətdiyi yanğın nəticəsində dövlət əmlakı və şəxsi əmlak məhv edilmişdir. Həlak olanların arasında qadınlar, uşaqlar və qocalar, həmçinin təcili yardım işçiləri və milis nəfərləri olmuşdur. SSRİ Konstitusiyası, Azərbaycan SSR Konstitusiyası kobudcasına pozulmuş, Azərbaycan Respublikasının suveren hüquqları tapdalanmışdır. Qabaqcadan düşünülüb hazırlanmış bu təcavüzkarlıq aksiyası Azərbaycan xalqının demokratiya və milli azadlıq uğrunda mübarizəsini boğmaq, xalqı təhqir edərək ona mənəvi zəbə vurmaq məqsədi daşımışdır.

1990-cı ilin yanvarında xalqımız, daha bir faciəli tarixə şahidlik elədi. Qarlı qış günündə rus və erməni silahlı quldurları Bakıda qırğınlar törətdilər. Qadınlara, qocalara, uşaqlara, ümumiyyətlə dinc sakinlərə aman verilmədi.
Əslində 20 Yanvar hadisələrinin tarixi bir qədər də əvvələ gedib çıxır. Hələ XVIII əsrdə Pyotrun dövründən Azərbaycan torpaqlarında məskunlaşdırılan ermənilərin burada yerləşdirilməsi siyasi maraqlara hesablanmışdı. Belə ki, gələcəkdə burada “erməni dövləti” yaratmaq və onların əli ilə işğalçılıq planlarını həyata keçirmək, daha sonra isə həm Azərbaycana, həm də Türkiyəyə qarşı ərazi iddiaları irəli sürmək nəzərdə tutulmuşdu. Bu proseslərin davamı olaraq 1905-ci il hadisələrini, 1918-ci il mart soyqırımını, 1948-53-cü il hadisələrini, 1988-ci ildən bəri baş verən qırğın və deportasiya proseslərini misal göstərmək olar.
Bu faciələrin törədilməsi zamanı ümumilikdə 100 minlərlə soydaşmız qırğınların qurbanı oldu. Göründüyü kimi 20 Yanvar faciəsinin də törə-dilməsi planlı şəkildə həyata keçirilmişdi.
Bu faciənin baş verməsi həm də siyasi amillərlə bağlı idi. SSRİ-nin dağılması ilə Rusiyanın Qafqazda mövqeyinin itirilməsi təhlükəsi yaranırdı. Ona görə də Rusiyanın bu çirkin əmələ əl atması təbii idi. Lakin bu hadisələr Azərbaycan xalqının müstəqillik ideyalarına zərbə vura bilmədi.
Azərbaycanın müstəqil olmasını qəbul etməyən mənfur qonşularımız zaman-zaman xalqımızı qırğınlara məruz qoydular. Onlar ərazilərimizin iş-ğalını həyata keçirdilər. Azərbaycanın müstəqilliyi isə yaşadı. Daha ətraflı »