Sentyabrın 16-da Səmərqənddə Şanxay Əməkdaşlıq Təşkilatına üzv ölkələrin Sammiti keçirilib. Sammitdə Azərbaycan Respublikasının Prezidenti İlham Əliyev iştirak edib.
Azərbaycan Prezidenti tədbirdə çıxış edib.
Dövlətimizin başçısı çıxışında Azərbaycanın tranzit və nəqliyyat-logistika imkanları barədə məlumat verib. O bildirib ki, Azərbaycan Şərq-Qərb və Şimal-Cənub nəqliyyat dəhlizləri kimi regional kommunikasiya layihələrinin işə düşməsinə sanballı töhfələr verib.
Hazırda Bakı Beynəlxalq Dəniz Ticarət Limanı ildə 15 milyon ton yükdaşıma qabiliyyətinə malikdir və bu, ildə 25 milyon tona qədər artırıla bilər.
Bu ilin ilk 7 ayında Azərbaycan ərazisindən keçən tranzit 50 faizə yaxın artıb.
Azərbaycan 52 gəmi ilə Xəzər dənizində ən böyük mülki yük donanmasına malikdir. Bakı gəmiqayırma zavodu bütün növ gəmilər istehsal edə bilir.
Son 20 ildə Azərbaycanda 19 min kilometr avtomobil yolu, 1400 kilometr dəmir yolu tikilib və ya əsaslı təmir edilib. Bu gün Azərbaycan 2020-ci il İkinci Qarabağ müharibəsindəki Qələbədən sonra işğaldan azad edilmiş ərazilərdə minlərlə kilometr avtomobil yolu və yüzlərlə kilometr dəmir yolu çəkir.
Prezident İlham Əliyev diqqətə çatdırıb ki, Azərbaycan 18 təyyarə ilə regionumuzda ən böyük mülki ha-va yük donanmalarından birinə malikdir. Daha ətraflı »

Ermənistan tərəfindən sərhəddə törədilən geniş-miqyaslı təxribatın qarşı-sının alınması zamanı şəhid olan Azərbaycan Silahlı Qüvvələrinin hərbi qulluqçusu, müddətdən artıq həqiqi hərbi xidmət keçən əsgər, 1996-cı il təvəllüdlü Əhmədzadə Məftun Seymur oğlunun cənazəsi sentyabrın 16-da doğulduğu Tərtər rayonunun Evoğlu kəndinə gətirilib.
Şəhidlə vida mərasimində Tərtər Rayon İcra Hakimiyyətinin başçısı Müs-təqim Məmmədov, hüquq-mühafizə orqanlarının rəhbərləri, “N” saylı hərbi hissənin əsgər və zabitləri, şəhid ailələri, qazilər, veteranlar, rayon ictimaiyyətinin nümayəndələri, kənd sakinləri, şəhidin doğmaları və döyüş yoldaşları iştirak ediblər.
Mərasimdə cənazə na-mazı qılınıb, şəhidin ruhuna dualar oxunub.
Kənd qəbiristanlığındakı dəfndə izdiham yaşanıb və mərasim iştirakçıları “Şəhidlər ölməz, Vətən bölünməz!” şüarı səsləndiriblər. Dəfn mərasimində cənazənin üzərindəki üçrəngli Azərbaycan bayrağı Tərtər Rayon İcra Hakimiyyətinin başçısı Daha ətraflı »

Bu günlərdə Tərtər rayon İcra Hakimiyyətinin başçısı Müstəqim Məmmədovun rayonun Yuxarı Sarıcalı kəndində növbədənkənar qəbulu keçirilmişdi. Həmin qəbul zamanı sakinlər kəndin bir sıra problemləri ilə bağlı rayon rəhbərinə müraciət etmiş, bunların həllində köməklik göstərilməsini xahiş etmişlər. Qəbuldan dərhal sonra qaldırılan məsələlərlə bağlı əlaqədar qurumlara göstəriş verilib və vətəndaşların müraciətləri operativ həll olunub.

Belə ki, kənddə məktəbə gedən yola çınqıl tökülərək hamarlanıb, yolun kənarları qaydaya salınıb.
Rayon Elektrik Şəbəkəsi tərəfindən 160 KVA transformatorda carı təmir işləri aparılıb. 0,4 klovatlıq açarlar, keçid izolyatorları yenisi ilə əvəz olunub, dayaq izolyatorları quraşdırılıb, transformatorun qapıları tə-mir-bərpa olunub, 0,4 klovatlıq çıxış kabeli 4×50 nay kabeli ilə dayağa verilib, 10 klovatlıq giriş naqilləri dəyişdirilib, transformator rənglənib.
Aztelekom MMC-nin Mərkəzi Aran Regional Filialının Tərtər Rayon Şö-bəsinin müdiri Cavid Əliyev vətəndaşların müraciətləri ilə bağlı kənd sakinləri ilə görüşüb, onlara məlumat verərək bildirib ki, Yuxarı Sarıcalı kəndi də daxil olmaqla Düyərli, Ələs-gərli, Yenikənd, Bayandur, Səhlabad, Əskipara kənd-lərinə də telefon və internet xəttinin çəkilməsi üçün artıq layihə hazırdır, şəhər mərkəzində işlər başa çatdıqdan sonra adları qeyd olunan yaşayış məntəqələri də ilin sonunadək telefon və internet xətti ilə təmin ediləcəklər.
Yuxarı Sarıcalı kənd sa-kinləri müraciətlərinin qısa müddətdə həll olunmasından razıdırlar.

Görüş zamanı kəndin ümumi problemləri diqqətə çatdırılıb

Tərtər Rayon İcra Hakimiyyətinin başçısı Müstəqim Məmmədovun rayonun Ələsgərli kəndində səyyar qəbul-görüşü keçirilib. Qəbulda hüquq-mühafizə orqanlarının, səhiyyə, təhsil, mədəniyyət, digər xidmət təşkilatlarının rəhbərləri, ərazi icra nümayəndələri, bələdiyyə sədrləri və kənd sakinləri iştirak ediblər. Öncə tədbir iştirakçıları kənddə şəhidlərin xatirəsinə ucaldılmış abidənin önünə gül-çiçək dəstələri düzüb, xatirələrini ehtiramla anıblar.

Rayon icra hakimiyyəti-nin başçısı sentyabrın 13-də Ermənistan silahlı qüvvələrinin Azərbaycanın Kəlbəcər, Laçın, Daşkəsən və Zəngilan rayonları istiqamətində törətdiyi geniş-miqyaslı təxribatların qarşısını alan zaman Azərbaycan Ordusunun şəhid verdiyini bildirib, şəhid ailələrinə dərin hüznlə başsağlığı verib, Ulu Tanrıdan onlara rəhmət diləyib. Qəbul zamanı öncə şəhidlərin ruhu bir dəqiqəlik sükutla yad edilib.
Sonra rayon rəhbəri kəndin sosial-iqtisadi inkişafı, əhalisi, onların məşğuliyyəti, görülən işlər barədə də məlumat verib.
Qeyd edilib ki, Ələsgərli kəndində son üç ildə 3 ədəd subartezian quyusu qazılıb, 1000 metr su arxı lildən təmizlənib, kəndin mərkəzi yoluna asfalt örtüyü salınaraq kənar hissələri abadlaşdırılıb.
İcra başçısı sakinlərə Rəqəmsal icra hakimiyyəti portalına telefon vasitəsi ilə bu və digər məsələlərlə bağlı müraciət edə bilmələri haqqında da məlumat verib, əkin sahələrində baş verəcək yanğın hadisələrinin qarşısının alınması tədbirlərindən danışıb, erkən nikah və onun fəsadlarından da söhbət açıb, əlaqədar qurumları, hər kəsi erkən nikaha qarşı mübarizəyə çağırıb, bu sahədə güclü maarifləndirmə işlərinin aparılmasına ehtiyac olduğunu bildirib.
Sonra sakinlərin müraciətləri dinlənilib.
Kənd sakinlərindən Rafiq Əliyev yeni subartezian quyusunun qazılması, işıq naqillərinin sip kabellə əvəzlənməsi, Məhəmmədəli Məmmədov elektrik dirəklərinin dəyişdirilməsi və kəndin su arxına qapı qoyulması və digər məsələ-lərlə bağlı müraciət ediblər.
Qaldırılan məsələlərin bəziləri yerində həll olunub, bir qismi nəzarətə götürülüb, rayon rəhbəri tərəfindən əlaqədar qurumlara aidiyyəti tapşırıqlar verilib.

“Yeni Tərtər”

Sentyabrın 15-i, “Bilik Günü” kimi qeyd olunan ilk dərs günü. Müəllimlərin də, şagird-lərin də, hətta valideynlərin də həsrətlə gözlədiyi bir gün. Xüsusilə birinci sinfə qədəm qoyan birincilərin və onların müəllim və valideynlərinin sevincinə səbəb olacaq bir gün olmalıydı. Lakin gözlərdə niskil, üzlərdə kədər oxunurdu, söylənilən hər kəlmədə şəhidlərimiz xatırlanırdı. Buna səbəb isə sentyabrın 13-də Ermənistan silahlı qüvvələrinin gecə qaranlığında ərazilərimizin Kəlbəcər, Daşkəsən, Laçın istiqamətlərində törətdiyi təxribat və bunun nəticəsində hərbçilərimizin şəhid olması idi.
– Şəhidlər bizim qürur yerimizdir. Biz onların qəhrəmanlığı sayəsində “Qarabağ Azərbaycandır” deyə bilirik. Mək-təbə qədəm qoyan bütün birinciləri və onların valideynlərini təbrik edirəm, – söylədi 1 saylı tam orta məktəbin 1-ci “A” sinif müəllimi Ülviyyə Məmmədova.
Sonra uşaqlar adı bu sinifə verilmiş Vətən müharibəsi şəhid Fərrux Həşimovun şəkli önünə qərənfillər düzdülər. Ülviyyə müəllim birincilərin ilk valideyn iclasını keçirərək, lazımi tapşırıqlarını verdi.

”Yeni Tərtər”

Tərtər Rayon İcra Haki-miyyətinin Başçısı Müs-təqim Məmmədov bir neçə gün öncə Mərkəzi Rayon Xəstəxanasına ağır vəziyyətdə yerləşdirilən, sonra müalicə üçün rayon rəhbərinin dəstəyi ilə Gəncə şəhər Abbas Səhhət adına 1 nömrəli xəstəxanaya göndərilən Axundov Misir Hilal oğlunu xəstəxanada ziyarət edib, səhhəti ilə maraqlanıb, qaziyə lazımi köməklik göstərib.
Qazi ona göstərilən diqqət və qayğıya görə öz minnətdarlığını bildirib.

Ürəkaçan nəticələr arzulayırıq

Pambıq yığımının başlamasına sayılı günlər qalıb. Cari ildə havaların quraq keçməsi bu sahədə bir sıra çətinliklər ya-ratsa da, fermerlərimiz bütün imkanlarını maksimum səfərbər edərək, bol məhsul yetişdirmişlər.
Tərtər rayon Aqrar İnkişaf Mərkəzinin bitkiçilik sektorunun müdiri Arif Behbudovun verdiyi məlumata görə, 2022-ci ilin məhsulu üçün 3440 hektar ərazidə pambıq becərilməsi məqsədilə 1087 nəfər istehsalçı ilə müqavilələr bağlanıb.
Qeyd olunmalıdır ki, Tərtər rayonu bir neçə ildir ki, pambıqçılıqda hər hektarın məhsuldarlığına görə ölkə üzrə bi-rincilər sırasındadır. Ötən il isə bu rəqəm 31,8 sentner təşkil edib. Ayrı-ayrı fermerlər – Fazil Vəliyev, Miri Rzayev, İlkin Qurbanov pambıqçılıqda yüksək göstəricilərə nail olaraq, hər hektar sahədən 45-50 sentner məhsul götürmüşlər.
Cari ildə həm iqtisadi çətinliklərə, xüsusən də Rusiya-Ukrayna müharibəsi nəticəsində dünya nizamının pozulmasına, gübrə çatışmazlığına, həm də iqlim dəyişikliklərinə baxmayaraq, fermerlərimiz gecəni gündüzə qatıb, yaxşı məhsul becəriblər.
Azad olunmuş Suqovuşan Su Anbarından suyun gəlməsi də bu işdə onlara kömək olub.
Qarşıdakı günlərdə pambıqçılıqda ən mühüm mərhələ olan yığım başlayacaq. İndi bütün təsərrüfatlarda mövcud texnika bir daha nəzərdən keçirilir, son təmir işləri aparılır.
Pambıq təhvil veriləcək məntəqələrdə də hazırlıq işlərinin qızğın çağıdır.
Vaxtıilə sovetlər dönəmində “ağ qızıl” adlandırdığımız bu texniki bitkinin becərilib hasilə gəlməsi olduqca çətin və çox zəhmət tələb edən bir prosesdir. Lakin nəticələr uğurlu olanda, zəhmət bəhrə verəndə çətinliklər arxada qalmış olur.
Odur ki, hər birinizə yaxşı nəticələr, bol ruzi, ailə büdcənizin möhkəmləndirilməsini arzulayırıq, əziz fermerlər.

Svetlana Bağırova

”Həyat belədir ki, bunun əvvəli də var, sonu da var. Heç kim əbədi həyatda qalmır. Amma şəhid olmaq, bu, xalq qarşısında, tarix qarşısında və gələcək nəsillər qarşısında böyük xidmətdir. Şəhid əbədi qalır və əməyi, qəhrəmanlığı əvəzolunmazdır”.

İlham Əliyev, Azərbaycan Respublikasının Prezidenti

DUMAN, SALAMAT QAL…

Borsunlu kəndinin sakini olan Elman Məmmədov mərmi yağışı altında – 1991-ci il avqustun 17-də dünyaya gəlmişdi. Elə müharibə də həyatına son qoydu – 2020-ci il noyabrın 4-də şəhidlik zirvəsinə ucaldı.
Elman onu tanıyanların hər birinin xatirində qorxmaz, igid, eyni zamanda çox şən bir insan kimi qalıb. Anası ilə həmişə zarafat edib deyərmiş ki, gözümü açıb müharibə görmüşəm, onun başa çatmasında da özüm içtirak edəcəyəm.
Borsunlu rayonumuzun ən gözəl kəndlərindən biridir. Təbiəti füsunkardır. Kəndin ətrafındakı təpələr bu mənzərəyə xüsusi yaraşıq verir. Elman da təbiəti, ümumiyyətlə gözəlliyi çox sevirdi. Böyüyüb orta məktəbi bitirdikdən sonra fotoqraf peşəsini seçmişdi. Adi gözlə görə bilmədiyini fotoobyektivinin gözü ilə görür və olduqca maraqlı şəkillər çə-kirdi.
Günlərin birində onun fotoobyektivində bir qız göründü və Elman anladı ki, həyatında bundan başqa heç kəs ola bilməz. Rayonumuzun Ələsgərli kəndindən olan Xanımla o, çox az bir müddətdə xoşbəxt ailə həyatı yaşadı. Bundan sonra oğlu Adəm dünyaya gəldi, ancaq Xanımı itirdi. Həkimlər gənc ananın həyatını xilas edə bilmədilər. Daha ətraflı »

Rüstəmin anası Arifə xanım deyir ki, orduda xidmət edən oğlu ad gününə qalmış 4 gün müddətində hər axşam onlara zəng vururdu. Sanki ürəyini boşaltmaq istəyirdi. 19 ildə çox danışan olmamışdı. İndi isə ilk dəfə olaraq uzun müddət ailəsindən uzaq düşmüşdü. Atasına, anasına, qardaşlarına olan məhəbbətini onlara çatdırmağa tələsirdi. Komandirlərindən, yoldaşlarından danışırdı. Qardaşlarına tapşırırdı ki, özünüzü ordu həyatına hazırlayın, idmanla məşğul olun.
Rüstəm 22 sentyabr 2001-ci ildə Yuxarı Qapanlı kəndində anadan olub.
Sentyabrın 28-də valideynlərinə son zəngi gəldi. Həyəcanlıydı, amma bu həyəcanda bir fəxarət, qürur hissi də vardı. Dedi ki, narahat olmayın, az qalıb, tezliklə torpaqlarımızı işğaldan azad edəcəyik. Nankor qonşularımız bir daha nə bizim kənd camaatının, nə də başqalarının rahatlığını poza bilməyəcəklər. Həmin gün Yuxarı Qapanlı kəndi ermənilər tərəfindən atəşə tutulurdu. Rüstəmin atası Firqani Hacıyev sanki bu səsləri eşitmirdi. Onun bütün fikri cəbhədə böyük oğlu Rüstəmin yanındaydı. Rüstəmin tərkibində olduğu hərbi hissə Kəlbəcər istiqamətində döyüşürdü. Daha ətraflı »

Onlar ailədə beş qardaş idilər. Hər birinin arzuları vardı. Talehin isə ən böyük arzusu anasının rahat və xoşbəxt yaşamasıydı. Həddindən artıq zəhmətkeş olan ana həm çöl işinə gedir, həm ailədə 5 oğul və ataya qulluq edirdi. Gecəsi-gündüzü olmurdu. Hərdən anasının işdən-gücdən başı açılanda, şirin söhbətlər edirdilər. Taleh anasına söz vermişdi ki, təzə ev tikdirəcək, özündən balaca qardaşlarını böyütməyə kömək edəcək.
Məhərzadə Taleh Oqtay oğlu 1995-ci il dekabrın 10-da rayonumuzun Qaynaq kəndində anadan olmuşdu. Orta məktəbi bitirdikdən sonra kənddə müxtəlif özəl təsərrüfatlarda çalışmışdı. 2013-cü ildə orduya çağırılmış, 2015-ci ildə nümunəvi əsgər kimi xidmətini başa vurmuşdu.
Birinci Qarabağ müharibəsindən sonra doğulan Taleh atəşkəs dövründə yaşasa da, ermənilərin onun doğ-ma kəndinin sakinlərinə qarşı törətdikləri təxribatların şahidi olmuş, vətənpərvər ruhda böyümüşdü.
Odur ki, 2020-ci il sentyabrın əvvəllərində o, Azərbaycan Ordusu sıralarında müddətdən artıq hərbi qulluqçu kimi xidmət etmək üçün müraciət edib. Bu vaxt qardaşı Sakit də ordudaydı, gizir işləyirdi. Daha ətraflı »